LAGA, STLTIMORLESTE.com – Deskonfia vitima insendiu iha Suku Ueru-Mata, Postu Administrativu Laga, Munisipiu Baucau, atual Xefe Suku Ueru-Mata, Sabino Martins neebe nia uma afeta ba insendiu, naran elimina husi lista apoiu material rekuperasaun.
Insendiu refere akontese iha tinan 2025 rezulta uma hela fatin rua mutuk total no uma ida seluk neebe pertense ba nia afetadu todan, tanba parte kakuluk sorin-sorin kuaze ahi han mutuk, nunee komunidade vizinhu sira salva dokumentus Suku nian no sasan seluk husi uma refere hafoin komunidade sobu total ho intensaun atu salva uma komunidade vizinhu sira seluk husi insendiu, tanba parte Bombeiru too iha fatin insendiu tarde.
Hafoin insendiu nee akontese, parte Autoridade Protesaun Sivil fo ona apoiu emerjensia ba vitima sira no kontinua halo levantamentu dadus no verifikasaun, iha neebe prosesu refere ekipa Autoridade Protesaun Sivil promete katak, uma tolu refere sei hetan apoiu material rekuperasaun hanesan kalen, sementi, osan no sasan seluk husi Governu.
Maibe tuir vitima insendiu ida husi uma tolu refere, Sabino Martins atual Xefe Suku Ueru-Mata asesu lista apoiu material rekuperasaun neebe tuir planu atu distribui ba vitima dezastre naturais iha loron 10 Junhu 2026, vitima insediu Sabino Martins nia naran elimina husi lista material rekuperasaun. Enkuantu uma rua seluk naran iha lista no sei hetan material rekuperasaun.
“Hau sente sira halo politika manipula hau. Sira tenke koalia lolos hanesan autoridade, karik hau laiha direitu atu simu, koalia lolos para hau rona. Labele dehan hau nia uma nee dapur. Ida nee mak hau la satisfas, sira koalia hanesan nee provoka fali hau, hateten vitima insendiu Sabino Martins ba STL iha Ueru-Mata, Segunda (25/05/2026).
Vitima insediu nee konsidera, parte Autoridade Protesaun Sivil soran vitima insnediu iha Suku Ueru-Mata, tanba insendiu refere liu husi uma rua seluk hafoin alastra ba nia uma hela fatin, maibe ikus naran elimina husi lista material rekuperasaun, tanba Autoridade Protesaun Sivil konsidera uma refere dapur.
Sabino kestiona parte Autoridade Protesaun Sivil nia servisu ba halo levantamentu dadus no verifikasau la justu, tanba uma refere uma hela fatin, laos dapur. Nunee husu Autoridade Protesaun Sivil atu foti dezisaun ba apoiu material rekuperasaun tenke justu no loos.
“Hau husu diak liu rua nee kansela, apoiu karik apoiu dala ida, tanba akontese nee iha oras ida nia laran loron ida laran, nusa sira hetan hau la hetan fatin,” Vitima insendiu nee sujere.
Iha fatin hanesan sasin Sabino Cardoso haktuir, tuir lista neebe fo sai vitima insendiu hanesan Sabino Martins la hetan material rekuperasaun nuudar asaun diskriminasaun, tanba uma neebe pertense ba Sabino Martins atual Xefe Suku Ueru-Mata nuudar uma hela fatin iha neebe konstrui kedas iha tinan 1983 hafoin hetan insendiu iha tinan 2025.
“Ahi han uma nee hau mos marka prezensa iha nee ami mak hamate ahi nee duni, ahi nee iha uma neeba mak alastra mai uma nee, nee uma Xefe Suku nian duni desde 1983 nee uma hela fatin mak nee duni,” sasin Sabino haktuir.
Nia fo mos testemunha, iha momentu ekipa verifikador husi Autoridade Protesaun Sivil halo verifikasaun ba uma refere, fo ona rezultadu pozitivu katak sei hetan apoiu material rekuperasaun, tanba uma hela fatin laos dapur, maibe rezultadu ikus hatudu naran elimina husi lista material rekuperasaun tinan 2026.
Enkuantu too notisia nee publika STL seidauk hetan komfirmasaun husi Autoridade Protesaun Sivil. Entretantu uma Xefe Suku Ueru-Mata neebe afeta ba insendiu iha tinan 2025, konstrui ho material lokal, iha kuartu 3 no varanda ida neebe akumula xefe familia rua kompostu Xefe Suku ho nia familia seluk no daudaun uma refere konstrui hikas ona ho material fabrikadu.
(tom)
